सुर्खेत- कोहलपुर–सुर्खेत १३२ केभीए विद्युत् प्रसारण लाइनको ५० प्रतिशत काम सकिएको छ।
अहिले विद्युत् प्रसारण लाइनको काम धमाधम भइरहेको कोहलपुर–सुर्खेत १३२ केभीए विद्युत् प्रसारण आयोजनाले बताएको छ।
२०७७ असारदेखि सुरु भएको आयोजनाले हालसम्म सुर्खेत क्षेत्रमा ३० र कोहलपुर सबस्टेसनदेखि बर्दिया राष्ट्रिय निकुञ्ज क्षेत्रको चिसापानीसम्म १५ वटा हाइटेन्सन लाइनको टावर निर्माण सम्पन्न भएको छ।
बाँकी क्षेत्रमा टावरका लागि फाउन्डेसन निर्माण र रुख कटानको काम धमाधम भइरहेको आयोजनाले बताएको छ।
आयोजाले आगामी वर्षसम्मको बैशाख सम्म काम सम्पन्न गर्ने लक्ष्य लिएको आयोजनाका प्रमुख रवि कुमार चौधरीले बताएका छन।
प्रसारण लाइन विस्तारका लागि कोहलपुरदेखि सुर्खेतसम्म १६२ वटा टावर निर्माण हुदै छन भने १३ हजार ५४ वटा रुख कटान हुने भएका छन्।
आयोजना सुरु भएको लामो समयसम्म पनि बर्दिया राष्ट्रिय निकुञ्जले रुख कटानको अनुमति नदिँदा विस्तारको काम रोकिएको थियो।
केही महिनाअघि विभागीय जिम्मेवारी पाएको वन तथा वातावरण मन्त्रालयले रुख कटानको अनुमति दिएसँगै आयोजनाले हालसम्म ५० प्रतिशत काम सम्पन्न गरेको छ।
सुर्खेतसहित कर्णालीका १० वटै जिल्लाको विद्युत् समस्या समाधान गर्न एक मात्र विकल्प ठानिएको छ।
