डिल्लीबजार कारागारबाट १४ वर्षअघि फरार भएका एक कैदी अन्ततः प्रहरीको फन्दामा परेका छन्। ओखलढुंगाको लिखु गाउँपालिका–२ का ४५ वर्षीय पेशलराज बुढाथोकीलाई प्रहरीले काठमाडौंको गोंगबु क्षेत्रबाट बुधबार पक्राउ गरेको हो।
२०६६ साल साउनमा काठमाडौं जिल्ला अदालतले वैदेशिक रोजगारीसम्बन्धी ठगीको मुद्दामा उनलाई तीन वर्ष कैद र तीन लाख रुपैयाँ जरिवाना तोकेको थियो। त्यसैअनुसार २०६६ साल फागुनमा कारागार चलान गरिएका बुढाथोकी २०६७ साल साउन २९ मा जेलबाट भागेका थिए।
अनुसन्धानका क्रममा बुढाथोकीले अन्जु महर्जन र सरस्वती मगरलाई विदेश पठाउने प्रलोभन देखाउँदै ठगी गरेको खुलासा भएको थियो। पीडितहरूले उजुरी दिएपछि उनलाई अदालतले दोषी ठहर गरेको थियो।
प्रहरीले लामो अनुसन्धानपछि बुढाथोकीलाई पक्राउ गरेको हो। फरार रहेका कैदीलाई कानूनी प्रक्रियामा ल्याउनु प्रहरीका लागि चुनौतीपूर्ण भए पनि १४ वर्षपछि उनलाई पक्राउ गरिनु कानूनी सफलता मानिएको छ।
