मोदीलाई दिने निमन्त्रणापत्र लिएर परराष्ट्रमन्त्री भारत जाँदै
परराष्ट्रमन्त्री डा. आरजु राणा देउवाले आइतबारदेखि चार दिनका लागि भारतको औपचारिक भ्रमण गर्ने तय भएको छ । मन्त्रिपरिषद्को बिहीबार बैठकले परराष्ट्रमन्त्रीको भ्रमण स्वीकृत भएको उनको सचिवालयका एक सदस्यले जानकारी दिएका छन् । उनी बुधबार स्वदेश फर्किने कार्यक्रम छ ।
परराष्ट्रमन्त्री भएपछि उनको पहिलो विदेश भ्रमण हुन लागेको हो । भारतीय विदेशसचिव विक्रम मिश्रीले विदेशमन्त्री डा. एस जयशंकरका तर्फबाट परराष्ट्रमन्त्री राणालाई भारत भ्रमणको निमन्त्रणा दिएका थिए। उनले समकक्षी जयशंकरसँग सोमबार द्विपक्षीय वार्ता गर्ने कार्यक्रम छ ।
उनले भारतीय जनता पार्टीका विदेश विभाग प्रमुख डा. विजय चौथाइवालेलगायतसँग पनि भेटवार्ता गर्ने कार्यक्रम छ । परराष्ट्रमन्त्री राणाले प्रधानमन्त्री केपी ओलीका तर्फबाट भारतीय प्रधानमन्त्री नरेन्द्र मोदीलाई निमन्त्रणापत्र लिएर जानेछिन् । भारतीय प्रधानमन्त्री मोदीसँग भेटेरै निमन्त्रणा हस्तान्तरण गर्ने परराष्ट्रमन्त्रीको इच्छालाई भारतीय विदेश मन्त्रालयले सकारात्मक जवाफ दिएको उनी निकटस्थहरूले बताएका छन् ।
मोदीसँगकाे भेटबारे भारतीय प्रधानमन्त्री कार्यालयले यकिन गर्न बाँकी छ । भारत भ्रमणका क्रममा परराष्ट्रमन्त्री राणाले नियमित स्वास्थ्य परीक्षण गर्ने पनि कार्यक्रम छ । परराष्ट्र मन्त्रालयका वरिष्ठ अधिकारीसहित जान लागेकी उनी बुधबार स्वदेश फर्किने कार्यक्रम छ ।
