कोइला खानी विस्फोट हुँदा 51 जना को मृत्यु
पूर्वी इरानको खोरासान प्रान्तमा रहेको एक कोइला खानीमा भएको विस्फोटमा कम्तीमा ५१ जनाको मृत्यु भएको पुष्टि भएको छ। सरकारी सञ्चारमाध्यमहरूका अनुसार शनिबार राति स्थानीय समयअनुसार करिब ९ बजे खानीका दुईवटा ब्लकमा मिथेन ग्यास चुहिएर विस्फोट भएको थियो। घटनास्थल राजधानी तेहरानबाट करिब ५४० किलोमिटर टाढा रहेको बताइएको छ।
विस्फोट भएको समयमा खानीका ब्लकहरूमा ६९ जना कामदारहरू उपस्थित थिए। दक्षिणी खोरासानका गभर्नर जावेद गेनातजादेहले भनेका छन्, “कामदारहरू खानीको गहिराइमा काम गरिरहेका बेला अचानक मिथेन ग्यासको चुहावटले विस्फोट गरायो, जसका कारण ठूलो क्षति भयो।”
विस्फोटपछि उद्धार टोलीहरूले तुरुन्तै खानीमा फसेका कामदारहरूको खोजी गर्न थालेका थिए, तर जोखिमपूर्ण अवस्थाका कारण उद्धार कार्य निकै चुनौतीपूर्ण भएको बताइएको छ। हालसम्म ५१ जनाको मृत्यु पुष्टि भएको छ भने बाँकी कामदारहरूको अवस्था स्पष्ट हुन बाँकी छ। स्थानीय अधिकारीहरूले बाँकी जीवितहरूलाई उद्धार गर्न प्रयास जारी राखेको जनाएका छन्। खानीको सुरक्षा र कामदारहरूको जीवनरक्षा सुनिश्चित गर्न थप अनुसन्धान थालिएको छ।
विस्फोटको कारण मिथेन ग्यासको चुहावट भएको भनिए पनि यसलाई कसरी रोकथाम गर्न सकिएन भन्नेबारे थप अनुसन्धान भइरहेको छ। इरानको खानी क्षेत्रमा यस प्रकारका घटना पहिले पनि भएका छन्, तर यति ठूलो संख्यामा जनधनको क्षति पहिलोपटक भएको बताइएको छ। इरानका राष्ट्रपति र उच्च अधिकारीहरूले मृतकका परिवारप्रति समवेदना व्यक्त गर्दै उद्धार कार्यलाई तीव्र गतिमा सम्पन्न गर्न निर्देशन दिएका छन्।
स्थानीय बासिन्दाहरूले भने खानीको सुरक्षा व्यवस्थाप्रति असन्तुष्टि जनाएका छन्। उनीहरूको भनाइ छ कि खानीमा कार्यरत मजदुरहरूको सुरक्षाका लागि पर्याप्त व्यवस्थापन नभएको कारण यस्ता घटनाहरू बारम्बार हुने गरेका छन्।
