शिक्षकको कुटाइले विद्यार्थीको कानको जाली फुट्यो, दोषी लाई कारबाही गर्न किन पछि हट्दै छ पुलिस प्रसान
भक्तपुर नगरपालिका देकोचास्थित जेन्युइन इङ्लिस सेकेन्डरी स्कुलमा कम्प्युटर शिक्षकको कुटाइबाट ६ कक्षामा अध्ययनरत १२ वर्षीय विद्यार्थी एरिकप्रताप थापा गम्भीर घाइते भएका छन्। शिक्षक निर्जन श्रेष्ठले गरेको कुटपिटका कारण एरिकको दाहिने कानको जाली फुटेको छ।
घटना अनुसार, अक्षर राम्रो बनाउन र छिट्टो लेख्न निर्देशन दिँदै शिक्षकले एरिकलाई टाउकोमा टुटुल्को आउने गरी कुटेका थिए। त्यसपछि फेरि कानमा जोडले प्रहार गर्दा एरिकको कान सुन्निनुको साथै एकातर्फको गाला सुन्निएको छ। एरिकका हजुरबुवा शिवकुमार थापाका अनुसार, नाति घर फर्किंदा कान सुन्निएको थियो, जसका कारण उनलाई तुरुन्तै अस्पताल पुर्याइएको थियो। भक्तपुरको अल्का अस्पतालमा चिकित्सकहरूले कानभित्र गहिरो चोट लागेको र कानको जाली फुटेको पुष्टि गरेका छन्। चिकित्सकले एरिकलाई एक महिनाको आराम गर्न सुझाव दिएका छन्।
यस्तो गम्भीर घटनापछि पनि विद्यालयले शिक्षकलाई शनिबारसम्म लुकाएको र कारबाही नगरेको अभिभावकहरूले गुनासो गरेका छन्। चिकित्सकले औषधिले सुधार नभएमा अपरेसन गर्नुपर्ने जानकारी गराएका छन्।
एरिकका अनुसार, शिक्षकले होमवर्क ढिला गरेको भन्दै कान र कञ्चटमा कुट्ने गरेका थिए। अन्य विद्यार्थीहरूले पनि उक्त शिक्षकको आतंकबाट पीडित भएको तर फेल गराइदिने डरले गुनासो गर्न नसकेको बताएका छन्। शिक्षकले कक्षामा मात्र होइन, अन्य विद्यार्थीहरूलाई पनि शारीरिक यातना दिने गरेको खुलासा भएको छ।
अभिभावकहरूले दोषी शिक्षकलाई कानुनी कारबाहीको माग गर्दै प्रशासनमा उजुरी गर्ने तयारी गरिरहेका छन्। विद्यालयले भने शिक्षक बेपत्ता भएको जनाएको छ। विद्यालयका प्रिन्सिपल योगेन्द्रमान बिजुक्छेले दोषी शिक्षकलाई माफी मगाउने, उपचार खर्च व्यहोर्ने र शिक्षकलाई बर्खास्त गर्ने निर्णय भएको जानकारी गराएका छन्।
यो घटनाले शैक्षिक संस्थाहरूमा विद्यार्थीमाथि हिंसात्मक व्यवहारको खतरनाक प्रभावलाई पुनः उजागर गरेको छ। अभिभावकहरूले यस्ता हिंसात्मक गतिविधिलाई रोक्न कडा कदम चाल्नुपर्ने माग गरेका छन्।
