प्रयोगकर्ताको पासवर्ड सुरक्षित तरिकाले नराखेको भन्दै फेस्बुक का मालिक मेटालाई १३ अर्ब रुपैयाँ जरिवाना
फेसबुकको मातृ कम्पनी मेटालाई डेटा सुरक्षासम्बन्धी लापरबाहीका कारण ९१ मिलियन युरो (अन्दाजी १३ अर्ब ६० करोड नेपाली रुपैयाँ) जरिवाना तिर्नुपर्ने भएको छ। आयरल्याण्डको डेटा संरक्षण आयोग (DPC)ले मेटाले प्रयोगकर्ताका पासवर्डलाई असुरक्षित तरिकाले भण्डारण गरेको खुलासा गरेपछि यो कारबाही गरिएको हो। अनुसन्धानका क्रममा मेटाले सामाजिक सञ्जाल प्रयोगकर्ताहरूको पासवर्डलाई आन्तरिक प्रणालीमा इनक्रिप्सन बिना जस्ताको तस्तै भण्डारण गरेको पाइएको थियो।
यो विषय सन् २०१९ को अप्रिल महिनामा बाहिर आएको थियो, जसमा मेटाले लाखौं प्रयोगकर्ताका पासवर्डलाई इनक्रिप्सन बिना नै आन्तरिक डेटा प्रणालीमा भण्डारण गरेको आरोप लागेको थियो। इनक्रिप्सन बिना भण्डारण गरिएका पासवर्डहरू कुनै पनि अनधिकृत व्यक्ति वा कर्मचारीको पहुँचमा पर्न सक्ने जोखिम रहेकोले यो गम्भीर लापरवाहीको रुपमा लिइएको हो। यो पासवर्डको सुरक्षासम्बन्धी गम्भीर त्रुटि भए पनि, मेटाले तत्कालै यसको समाधान गर्ने कदम चालेको दाबी गरेको थियो।
यस घटनाको अनुसन्धान २०२४ मा पूरा भएपछि आयरल्याण्डको डेटा संरक्षण आयोगले मेटालाई ९१ मिलियन युरो जरिवाना गराउने निर्णय गरेको हो। डीपीसीको यो निर्णय २६ सेप्टेम्बरमा मेटालाई जानकारी गराइसकिएको छ। यो जरिवाना मेटाले डेटा सुरक्षासम्बन्धी लापरवाहीमा भोग्नुपरेका पछिल्ला कारबाहीहरूमध्ये एक हो।
मेटालाई यसअघि पनि ठूला रकमका जरिवाना तिराइएको थियो। मे २०२३ मा, मेटाले युरोप र अमेरिकाबीच डेटा स्थानान्तरणमा त्रुटि गरेको भन्दै १.२ अर्ब युरो जरिवाना भोग्नुपरेको थियो, जुन मेटासम्बन्धी सबैभन्दा ठूलो जरिवानामध्येको एक हो। यसबाहेक, सन् २०२२ मा लाखौं प्रयोगकर्ताहरूको व्यक्तिगत जानकारी ह्याकर फोरममा सार्वजनिक भएपछि मेटालाई २६५ मिलियन युरो जरिवाना गरिएको थियो।
मेटाको यस्तो डेटा सुरक्षासम्बन्धी लापरबाहीहरूले उसको ब्रान्ड र प्रतिष्ठामा गम्भीर असर गरेको छ। पछिल्ला घटनाक्रमहरूले प्रस्ट पार्छ कि डेटा सुरक्षा र गोपनीयता अबको डिजिटल युगमा अत्यन्तै संवेदनशील विषय हो, जसप्रति ठूला कम्पनीहरूले समेत ध्यान दिनुपर्ने चुनौती रहेको छ।
सुरक्षाको मामलामा बारम्बार आलोचनामा परेपछि मेटाले डेटा सुरक्षाका मापदण्डहरू सुधार गर्न लागिपरेको बताएको छ। यद्यपि, यस्ता जरिवाना र गल्तीहरूले उसलाई निरन्तर चुनौती दिइरहेको छ, जसको दीर्घकालीन प्रभाव उसको व्यापार र प्रतिष्ठामा पर्न सक्ने खतरा पनि छ।
