आज साँझदेखि काठमाडौँबाट लामो दूरीका सार्वजनिक यातायात सञ्चालन हुने कुन कुन जिल्ला जान्छ
राजधानी काठमाडौँबाट लामो दूरीका यात्रु बसहरू आज साँझदेखि पुनः सञ्चालनमा आउने तयारी भइरहेको छ। लगातारको वर्षा, बाढी, र पहिरोका कारण राजमार्गहरू अवरुद्ध भएपछि शुक्रबार साँझदेखि काठमाडौँबाट बाहिर जाने बसहरू रोकिएका थिए। दशैं नजिकिएसँगै राजधानीमा सयौं यात्रुहरू अलपत्र परेका थिए। तर, आज साँझदेखि यातायात पुनः सञ्चालनमा आउने पक्का भएको छ।
नयाँ बसपार्कमा यात्रुको भीड बढ्दै गएको छ, र बस सेवाका लागि टिकट बिक्री सुरू भइसकेको छ। ल्होत्से बहुउद्देश्यीय प्रालिका व्यवस्थापक पंकज मल्लका अनुसार अरनिको राजमार्गमार्फत दोलखा, रामेछाप, सिन्धुली, सिन्धुपाल्चोक, र काभ्रे लगायतका जिल्लाहरूलाई बाहेक अन्य जिल्लाहरूका लागि बसहरू छुट्नेछन्। “सडकको अवस्था ठिक भए, पानी परेन भने साँझ ४ बजेपछि बसहरू छुट्न थाल्नेछन्,” मल्लले जानकारी दिए।
त्रिभुवन राजपथ, पृथ्वीराजमार्ग, नारायणगढ-मुग्लिन, र पूर्वपश्चिम राजमार्ग हुँदै विभिन्न जिल्लामा जाने यात्रुबाहक सवारीहरू सञ्चालनमा आउने छन्। तर, केही मुख्य राजमार्गहरू, जस्तै बिपी र अरनिको राजमार्गमा भएका अवरोधहरूका कारण ती मार्गहरू कहिले सञ्चालनमा आउने भन्ने अझै स्पष्ट भइसकेको छैन।
महानगरीय ट्राफिक प्रहरी कार्यालयका प्रहरी नायब उपरीक्षक (DSP) रबिन कार्कीका अनुसार, धादिङको झ्याप्ले खोला र सिम्ले क्षेत्रमा आंशिक अवरोधहरू अझै बाँकी छन्। तर, ती अवरोधहरू हटाउनका लागि काम भइरहेको छ र अवरोध हट्नासाथ बसहरूलाई छुट्न अनुमति दिइनेछ। उनले भने, “गाडीहरू पास हुन सक्ने अवस्थाको अध्ययन गरिरहेकाछौं, आजैदेखि बसहरू छुट्न दिने तयारी छ। यात्रुहरूलाई सुरक्षित रूपमा यात्रा गराउन र लामो समय जाममा नपर्नेसहितको योजना बनाइएको छ।”
यसैबीच, नागढुंगा नाकामा केही बसहरू हिँडिसकेको जानकारी प्रहरीले दिएको छ। तर, मौसम प्रतिकूल भएमा वा थप अवरोधहरू उत्पन्न भएमा सवारीलाई रोक्नुपर्ने सम्भावना रहेको छ। विभिन्न क्षेत्रमा क्षतिग्रस्त पुल र सडकको मर्मतकार्य जारी रहेको र त्यसपछि मात्रै पूर्ण रूपमा यातायात सञ्चालन हुनसक्ने बताइएको छ।
सार्वजनिक यातायात सञ्चालन नहुँदा देशभर दशैंको लागि गाउँ फर्कने यात्रुहरू अत्यन्तै प्रभावित भएका थिए। अब, अवरोधहरू हट्न थालेसँगै लामो दूरीका बसहरूलाई यात्रु बोकेर गन्तव्यतर्फ पठाउने तयारी गरिएको छ।
