नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले समाजवादी मोर्चामा आबद्ध दलहरू एउटै केन्द्र बनाउने उद्देश्यबाट विचलित हुन नहुने बताएका छन्। मंगलबार काठमाडौंमा आयोजित समाजवादी मोर्चाको सभामा सम्बोधन गर्दै उनले यस्तो धारणा राखेका हुन्।
प्रचण्डले आफूले मोर्चाप्रति कुनै अरुचि नभएको स्पष्ट पार्दै भने, “रणनीतिक दृष्टिले एउटै केन्द्र बनाउने हाम्रो उद्देश्यलाई कायम राख्नुपर्छ। कहिलेकाहीँ मलाई लक्षित गर्दै ‘प्रचण्ड नै अरुचि देखाइरहेका हुन् कि?’ भन्ने प्रश्न उठ्छ। तर यो सत्य होइन। बरु, म छिटो पार्टी एकता गर्न चाहने पक्षमा छु।”
उनले एकताको प्रक्रियामा हतार गर्न नहुनेमा पनि जोड दिए। “हतारले गरेको एकताले असफलता निम्त्याउन सक्छ। त्यसैले सोचविचारसहित एकता र ध्रुवीकरणको प्रक्रिया अघि बढाउनुपर्छ,” उनले भने।
सभामा प्रचण्डभन्दा पहिले सम्बोधन गरेका नेकपा एकीकृत समाजवादीका अध्यक्ष माधवकुमार नेपालले समाजवादी मोर्चाका कार्यक्रमप्रति प्रचण्डको सहभागीता कमजोर भएको संकेत गर्दै व्यंग्य गरेका थिए।
