चिनियाँ स्टार्टअप कम्पनी ‘डिपसिक’ले विकास गरेको आर्टिफिसियल इन्टेलिजेन्स (एआई) च्याटबटले अहिले विश्वको टेक बजारमा तहल्का मच्चाइरहेको छ। जनवरीमा अमेरिकामा लन्च भएको यो एप केही समयमै एप्पल स्टोरमा सर्वाधिक डाउनलोड गरियो। यसको लोकप्रियता र प्रभावका कारण अमेरिकी एआई उद्योगमा ठूलो हलचल मच्चिएको छ।
डिपसिकको प्रभाव र ऐतिहासिक घटना
ब्लूमबर्गको रिपोर्टअनुसार ‘डिपसिक’ले अमेरिकन टेक कम्पनीहरूमा ठूलो आर्थिक दबाब सिर्जना गरेको छ। एनभिडियाको सेयर मूल्य १७% ले घट्दा कम्पनीले ६ खर्ब अमेरिकी डलर बराबरको क्षति व्यहोरेको छ। यो गिरावटले एनभिडियालाई एप्पल र माइक्रोसफ्टपछि विश्वकै तेस्रो मूल्यवान् कम्पनीको स्थानमा खसाल्यो।
यो प्रभाव केवल एनभिडियामा सीमित भएन। संसारभरका ५०० भन्दा बढी धनाढ्यहरूले संयुक्त रूपमा एकै दिनमा १०८ अर्ब अमेरिकी डलर गुमाए। अमेरिकी राष्ट्रपति डोनाल्ड ट्रम्पले समेत यसबारे चिन्ता व्यक्त गरेका छन्।
डिपसिकको सफलताको कारण
डिपसिकको प्रमुख विशेषता यसको उच्च क्षमताको एआई मोडेललाई तुलनात्मक रूपमा निकै कम लागतमा निर्माण गर्नु हो। च्याटजीपीटी, गुगल जेमिनाई, र अन्य महँगो मूल्यका एआई मोडेलहरूलाई टक्कर दिने यो एपले केवल ६० लाख अमेरिकी डलरको लागतमा निर्माण भएको हो।
ओपनएआई र गुगलजस्ता कम्पनीहरूले क्रमशः वार्षिक पाँच अर्ब र ५० अर्ब डलर खर्च गर्दा डिपसिकको यो किफायती मोडेलले नयाँ इतिहास रचेको छ।
डिपसिक भी थ्री: शक्तिशाली नयाँ संस्करण
डिपसिकको प्रारम्भिक संस्करण ‘डिपसिक आर वान’ ले नै बजारमा चर्चा कमाएको थियो। अहिले यसको परिष्कृत संस्करण ‘डिपसिक भी थ्री’ सार्वजनिक भएको छ। यो एपले प्रयोगकर्तालाई च्याटजीपीटी जस्तै सेवा प्रदान गर्दै जीवनलाई प्रभावकारी र कुशल बनाउन मद्दत गर्छ।
डिपसिकका निर्माता लियाङ वेनफेङ
चीनको झानजियाङमा जन्मेका ४० वर्षीय लियाङ वेनफेङ डिपसिकका संस्थापक तथा सिइओ हुन्। प्रारम्भिक शिक्षामा कमजोर मानिएका वेनफेङले पछि एआई प्रविधिमा दक्षता हासिल गर्दै विभिन्न इनोभेटिभ कम्पनीहरूको स्थापना गरे।
सन् २०२३ मा डिपसिक लञ्च गर्नुअघि उनले हाङजो याकेवी इन्भेष्टमेन्ट म्यानेजमेन्ट (२०१३), झेजियाङ जियुझ्याङ एसेट म्यानेजमेन्ट (२०१५), र हाई फ्लाएर एआई (२०१९) स्थापना गरेका थिए।
