आन्दोलनरत पहिचानवादी पक्षधरले पाथीभरा क्षेत्रमा निर्माण हुने केबलकार र जारी आन्दोलनका विषयमा कोशी प्रदेश सरकारसँग वार्ता नगर्ने स्पष्ट पारेका छन्।
किरात थाक्थुङ चुम्लुङकी महासचिव निरन्ती तुम्बाफोका अनुसार, वार्ताको औपचारिक जानकारी आफूहरूले पाएको छैन। उनले भनिन्, “हामी हाल अस्पतालमा घाइतेहरूको उपचारमा व्यस्त छौं। वार्ताको आह्वानबारे कुनै आधिकारिक सूचना पाएका छैनौं। यस्तो परिस्थितिमा वार्ता गर्ने अवस्था छैन।”
गत शनिबार पाथीभरा मन्दिर क्षेत्रमा निर्माण हुने केबलकारको विषयमा आन्दोलनरत पक्ष र प्रहरीले झडप गरेका थिए, जसमा २६ जना घाइते भएका थिए। गोली लागेका केहीलाई काठमाडौंको शिक्षण अस्पतालमा उपचारका लागि भर्ना गरिएको छ।
प्रदेश सरकारले मंगलबार असन्तुष्ट पक्षसँग वार्ताका लागि आह्वान गरेको थियो। तर, किरात याक्थुङ चुम्लुङका केन्द्रीय अध्यक्ष प्रेम येक्तेनले वार्ताको औचित्य नरहेको बताए। उनका अनुसार, आन्दोलन र दमनका मुख्य मुद्दाहरू संघीय सरकारसँग जोडिएका कारण प्रदेश सरकारसँग छलफल गर्ने आवश्यकता छैन।
प्रदेश सरकारले मंसिर २४ गते आर्थिक मामिला तथा योजनामन्त्री रामबहादुर रानाको संयोजकत्वमा वार्ता टोली गठन गरेको थियो। उक्त टोलीमा भौतिक पूर्वाधार विकासमन्त्री भुपेन्द्र राई, आन्तरिक मामिला तथा कानुनमन्त्री रेवतीरमण भण्डारी, र मन्त्रालयका सचिव कमलबहादुर थापा सदस्य रहेका छन्।
आन्दोलनरत पक्षले घाइतेहरूको उपचार र मुद्दाहरूको उचित समाधानका लागि केन्द्र सरकारसँग मात्र वार्ता गर्नुपर्ने बताएका छन्।
