दोस्रो बृहत् सल्यान महोत्सवको स्थलमा शनिबार राति भीषण आगलागी हुँदा करिब ८० स्टल जलेर नष्ट भएका छन्। कर्णाली प्रदेश प्रहरी कार्यालय सुर्खेतका प्रवक्ता, प्रहरी वरिष्ठ उपरीक्षक (एसएसपी) शिवकुमार श्रेष्ठका अनुसार आगलागीका कारण महोत्सवका सबै स्टल र सामग्री पूर्ण रूपमा क्षतिग्रस्त भएका छन्। प्रारम्भिक अनुमानअनुसार, आगलागीबाट करिब साढे ३ करोड रुपैयाँ बराबरको क्षति भएको छ।

Advertisement

आगलागी शारदा नगरपालिका–१, श्रीनगरस्थित टाउन प्लानिङ क्षेत्रमा आयोजना गरिएको महोत्सवमा राति ११ बजेतिर भएको हो। स्थानीयवासी, व्यवसायी, महोत्सव आयोजक, र सुरक्षाकर्मीको टोलीले करिब तीन घण्टाको प्रयासपछि आगो नियन्त्रणमा लिएको थियो।

यस आगलागीका कारण महोत्सव पूर्ण रूपमा प्रभावित भएको छ। घटनाको कारणबारे अनुसन्धान भइरहेको प्रहरीले जनाएको छ।